婦女節快樂

婦女節快樂 持明仁增塔欽藏文詩

 ༡ དོན་དམ་མེ་ལོང་ངོས་ཀྱི་སྣང་སྟོང་ཞལ།། 

 འཕགས་མ་སྒྲོལ་མཛད་ལྷ་མོ་ཉེར་གཅིག་དང་།། 

མཆོད་སྤྲིན་སྤྲོ་བསྡུས་གར་བསྒྱུར་བཅུ་དྲུག་གིས།། 

ལང་ཚོའི་དཔལ་དང་ཤེས་རབ་སྤོབས་པ་སྩོལ།། 

 ༢ སྟོང་པ་མཁའ་ལ་ཕྱོགས་པའི་ཤེར་རབ་ཡུམ།། 

ཐབས་ཆེན་སྣང་བའི་རྩལ་རྫོགས་དཔའ་བོའི་སྐུ།། 

མི་ཕྱེད་སྒྱུ་འཕྲུལ་བཀོད་པས་བསྐྲུན་པའི་དཔལ།། 

མཚན་དཔེའི་མེ་ཏོག་བཞད་པའི་མཚོ་རྒྱལ་འདུད།། 

༣ སྲིད་པ་འཛམ་གླིང་གྲགས་པའི་སའི་ཁྱོན་ན།། 

མ་བསྡུས་མཛེས་པ་སྤུང་བའི་མོ་སྨན་རྣམས།། 

 སྐྱེས་བུས་ཏིང་ངེར་འཛིན་པའི་རྨི་ལམ་དང་།། 

རྐང་གཉིས་ཞིང་ས་བཟང་པོའི་བསྐྱེད་མ་ཡིན།། 

༤ ལུས་ཀྱི་འཁྲི་ཤིང་རྩ་ཁམས་བདེ་ཆེན་སྟུག། 

སྨིན་མ་མིག་ཡངས་དབང་སྡུད་འོད་ཟེར་འབྱེད།། 

ངག་སྙན་དབྱངས་ཀྱིས་སྐྱེ་བོའི་ཡིད་དབང་གསོ།། 

འཇིག་རྟེན་དགའ་མ་བུ་ཆུང་བསྐྱེད་པའི་སྨན།། 

༥ ནང་ན་གཡང་གཞི་འཁོར་བའི་ཁྱིམ་རྟེན་སྨན།། 

སྒོ་ནས་ནོར་གནག་འོ་མའི་མཚོ་འདྲེན་སྨན།། 

ཆོས་བཅུད་སྙིང་བརྩེས་རིགས་རྒྱུན་འཐུད་པའི་སྨན།། 

མཛེས་མཛངས་དྭངས་སྨན་ཕུན་ཚོགས་དཔའ་མོ་རྨད།། 

༦ ཤེས་རབ་མྱུར་བས་རིག་གནས་སློབ་པར་བདེ།། 

 ངང་གཤིས་ཞི་བས་ཆོས་དོན་མྱོང་བར་ཉེ།། 

ཟླ་ཞལ་སྒེག་པས་གཞན་སྣང་སྤྲོ་བར་བསྐུལ།།

མི་མོ་དྭངས་སྨན་ལྷ་མོ་བཞིན་དུ་བསྟོད།། 

༧ ཉུང་ངུའི་གྲངས་ཀྱིས་སྙད་པའི་ཕ་ཡུལ་འདིར།། 

གདོང་དམར་བཙན་པོའི་འཕེལ་རྒྱུན་རྒྱ་མཚོ་དང་།། 

དབྱར་གྱི་སྤང་ཁའི་མེ་ཏོག་བཀྲ་བ་བཞིན།། 

 ཕྱོགས་དང་མཐའ་ལ་ཁྱབ་པས་འཕེལ་གྱུར་ཅིག། 

 མོ་སྨན་དུས་ཆེན་ལ་རྒྱ་ཀོང་རིག་འཛིན་མཐར་ཕྱིན་ནས།

༢༠༢༥ ༣ ༨ 

 持明仁增塔欽 https://chihming8.blogspot.com/